55 శాతం ఫిట్ మెంట్ తో తక్షణం పీఆర్సీ ప్రకటించాలి 

• ఐదు డీఏల బకాయిలు విడుదల చేయాలి 

• కాంట్రాక్టు ఉద్యోగుల సర్వీసులు క్రమబద్దీకరించాలి 

• సచివాలయ ఉద్యోగులను బేషరతుగా క్రమబద్ధీకరించాలి

• ఏపీఎన్జీవో అధ్యక్షుడు బండి శ్రీనివాసరావు డిమాండ్

• సీపీఎస్ రద్దు చేయాలి

• ఏపీఎన్జీవో ప్రధాన కార్యదర్శి కెవీవీ శివారెడ్డి డిమాండ్

(ఉద్యోగులు.న్యూస్) (ఉద్యోగులు.కామ్)

సెప్టెంబరు 11:  పీఆర్సీని  55 శాతం ఫిట్ మెంట్ తో తక్షణం ప్రకటించాలని, ఐదు డీఏల బకాయిలు తక్షణం విడుదల చేయాలని  ఏపీఎన్జీవో రాష్ట్ర  అధ్యక్షుడు బండి శ్రీనివాసరావు  శనివారం డిమాండ్ చేశారు. ఏపీన్జీవో రాష్ట్ర నూతన కార్యవర్గం బాధ్యతలు చేపట్టిన తర్వాత అసోసియేషన్ సభ్యులంతా శనివారం శ్రీకాకుళం జిల్లా పర్యటనకు వచ్చారు . మొదట శ్రీకాకుళం సింహద్వారం నుంచి స్థానిక ఎన్జీవో హోం వరకు ఏపీఎన్జీవో రాష్ట్ర సహాధ్యక్షుడు చౌదరి పురుషోత్తంనాయుడు , జిల్లా జేఏసీ చైర్మన్ హనుమంతు సాయిరాం , కార్యదర్శి చల్లా శ్రీనివాసరావు , జిల్లా ఏపీ ఎన్జీవో నాయకులు రాష్ట్ర అధ్యక్షుడితోపాటు కార్యవర్గ సభ్యులకు పూర్ణకుంభ స్వాగతం పలికారు . అడుగడుగునా హారతులు దిద్ధి , పూలదండలు వేసి తమ అపూర్వ ఆత్మీయతను చాటిచెప్పారు.  

అనంతరం నిర్వహించిన విలేకరుల సమావేశంలో ఏపీఎన్జీవో రాష్ట్ర అధ్యక్షుడు బండి శ్రీనివాసరావు మాట్లాడుతూ రాష్ట్ర ముఖ్యమంత్రి జగన్ మోహన్ రెడ్డి ప్రభుత్వ ఉద్యోగులకు ఇచ్చిన హామీ మేరకు తక్షణమే 55శాతం ఫిట్మెంట్తో మెరుగైన పీఆర్ సీ ప్రకటించాలని డిమాండ్ చేశారు . కొన్ని ప్రభుత్వ విభాగాలకు సంబంధించి ఉద్యోగుల జీతాలకు బడ్జెట్ తో ముడి పెట్టకుండా ఒకటో తేదీనే జీతాలు చెల్లించేలా ముఖ్యమంత్రి చొరవ చూపాలని కోరారు . అన్ని అర్హతలతో సచివాలయ ఉద్యోగులుగా చేరిన వారికి అక్టోబర్ 2 నాటికి మళ్లీ పరీక్షలు  నిర్వహించడం సరికాదని , రూల్ ఆఫ్ రిజర్వేషన్ ప్రకారం సర్వీసు కమిషన్ నిబంధనలతో ఉద్యోగాల్లోకి వచ్చిన సచివాలయ ఉద్యోగులకు బేషరతుగా పూర్తి స్థాయి హోదా కల్పించాలని డిమాండ్ చేశారు . అవసరమైతే డిపార్ట్ మెంటల్ పరీక్షలు నిర్వహించి వారికి పదోన్నతులు కల్పించాలే తప్ప , అన్ని అర్హతలతో ఉద్యోగాలు పొందిన వారికి రెండు సంవత్సరాలు పూర్తెనందున తిరిగి పరీక్షలు నిర్వహించడం సరికాదన్నారు. 

పెరిగిన ధరలకు అనుగుణంగా ఉద్యోగులు , పెన్షనర్ల ప్రయోజనాలు పరిరక్షిస్తూ 5 పెండింగ్ డీఏ బకాయిలను విడుదల చేయాలని డిమాండ్ చేశారు . ఇప్పటి వరకు ఎరియర్స్ పెండింగ్లోనే ఉన్నాయని , ఎటువంటి డిఏ చెల్లించకుండానే పెన్షనర్లు , సర్వీసు ఉద్యోగుల నుంచి ఇన్ కం టాక్స్ వసూలు చేస్తున్నారని విమర్శించారు. 

సెప్టెంబర్ 1 న ఏపీఎన్జీవో సారథ్యంలో జాప్టో ఆధ్వర్యంలో సీపీఎస్ ఉద్యోగులంతా సీపీఎస్ రద్దు చేయాలని డిమాండ్ చేస్తూ విజయవంతంగా ప్రభుత్వానికి తమ నిరసనను తెలిపారని , వారి ఉద్యమ నిర్మాణాన్ని అభినందిస్తున్నామని తెలిపారు . ఏపీఎన్జీవో రాష్ట్ర ప్రధాన కార్యదర్శి కెవీవీ శివారెడ్డి మాట్లాడుతూ పెట్టుబడుల పెన్షన్తో బతుకంతా టెన్షన్ గా మారుతోందని , సుమారు రెండు లక్షల సీపీఎస్ ఉద్యోగుల ప్రయోజనాలు కాపాడుతూ సీపీఎస్ పెన్షన్ రద్దు చేసి , పాత పెన్షన్ ను అమలు చేయాలని కోరారు . రాజకీయ నాయకులు , ప్రజాప్రతినిధులకు జీవితకాలం పెన్షన్ ఇస్తున్నారని , 30 నుంచి 35 ఏళ్లు సర్వీసు చేసిన ఉద్యోగులకు ఎటువంటి ఆర్థిక భద్రత లేని సీపీఎస్ పెన్షన్ ను రద్దు చేయాలని కోరారు . 

ఉద్యోగులకు సెప్టెంబర్ నెలాఖరు, అక్టోబర్ మొదటి వారంలో 55 శాతం ఫిట్ మెంట్ తో మెరుగైన పీఆర్ సీ ప్రకటించి బకాయి డీఏలను విడుదల చేయాలని , కాంట్రాక్టు ఉద్యోగుల సర్వీసులను క్రమబద్ధీకరించాలని  సచివాలయ ఉద్యోగులను బేషరతుగా విధుల్లోకి తీసుకోవాలని ఏపీఎన్జీవో రాష్ట్ర సహాధ్యక్షుడు చౌదరి పురుషోత్తం నాయుడు , జిల్లా జేఏసీ చైర్మన్ హనుమంతు సాయిరాంలు కోరారు . అనంతరం ఏపీఎన్జీవో ఆధ్వర్యంలో నూతన అధ్యక్ష , కార్యదర్శులకు రాష్ట్ర , కార్యవర్గ సభ్యులకు ఆత్మీయ సత్కారం , అభినందన సన్మానం నిర్వహించారు .

ఎక్కువ మందిచదివినవి